Gipahinumdoman sa Malacañang ang mga ahensiya sa gobyerno nga magpahigayon og yano nga Christmas parties tungod sa nagpadayong mga lakang sa pagpamenos sa gasto ug gilaom nga mas grabeng epekto sa El Niño sa nasud sa Enero 2027.
Matod ni Presidential Communications Office (PCO) Undersecretary Claire Castro, wala magpagawas og bag-ong mando ang gobyerno, apan giawhag lamang ang mga ahensiya nga likayan ang mahalong pagsaulog tungod sa ubang prayoridad nga nagkinahanglan sa pondo sa gobyerno.
Samtang, gimando ni Presidente Ferdinand Marcos Jr. ang mga ahensiya ug lokal nga pangagamhanan nga siguruhon ang igong suplay sa tubig, pagkaon ug kuryente, ingon man panalipdan ang panginabuhi ug panglawas sa mga Pilipino.
Isip kabahin sa pagpangandam, gipangulohan ni Executive Secretary Ralph Recto ang tigom uban sa nagkalainlaing ahensiya ug lokal nga opisyal niadtong Nobyembre 4.
Gibantayan usab sa gobyerno ang lebel sa tubig sa mga dam, presyo sa mga batakang palaliton, ug suplay sa kuryente ug sugnod.
Gimando ni Recto nga unahon ang mga komunidad nga nameligro sa kakulang sa tubig ug grabeng kainit.
Andam usab ang National Irrigation Administration nga mohatag og mobile solar-powered irrigation pumps sa mga mag-uuma sa Region II, nga gilaom nga grabeng maapektuhan sa El Niño.
Mipasalig ang Malacañang nga andam ang gobyerno sa pagtabang sa mga komunidad nga maapektuhan sa maong panghitabo sa panahon.
