Gipasalig ni House Deputy Speaker Janette Garin nga nagpadayon ang trabaho sa Kongreso sa pag-andam sa nasudnong budget ug pagtubag sa posibleng epekto sa “Super El Niño,” bisan pa man sa nagpadayon nga proseso sa impeachment batok kang Bise Presidente Sara Duterte.
Matod ni Garin, wala gipasagdan sa mga magbabalaod ang ilang mga katungdanan tungod niini nga mga proseso. Gipunting niya nga ang pag-andam sa mga lehislatibong lakang—lakip na ang nasudnong budget ug mga inisyatibo aron maminusan ang epekto sa grabeng El Niño busa nagpadayon sumala sa gitakdang schedule.
Dugang pa ni Garin, bisan tuod wala nangita ang Kongreso niining proseso sa impeachment, obligasyon nila ubos sa Konstitusyon nga atubangon ang mga reklamo nga gisang-at. Gipasiugda usab niya nga dili angay mahunong ang ubang mga gimbuhaton sa gobyerno samtang nagpadayon kini nga proseso.
Samtang, nagpasidaan ang PAGASA nga ang kusog nga El Niño mahimong magpadayon hangtod sa sayong bahin sa 2027, nga posibleng moresulta sa pagkunhod sa ulan, hulaw, ug kakulang sa suplay sa tubig sa pipila ka mga lugar.
Nag-andam usab ang gobyerno og mga lakang aron mapanalipdan ang suplay sa pagkaon ug tubig, ug aron makahatag og suporta ngadto sa mga mag-uuma.
