Patay ang usa ka 77-anyos nga babaye human nabanggaan sa usa ka sakyanan samtang mitabok sa karsada sa C. Padilla Street, Barangay San Nicolas, dakbayan sa Sugbo.
Basi sa inisyal nga impormasyon, nilabang ang senior citizen aron mopalit og hulog-hulog nga tubig human wala motuman ang iyang anak sa iyang hangyo nga palitan siya og tubig mainom.
Gituohang posibleng nabanggan kini sa side mirror hinungdan nga natumba ug naigo ang ulo sa karsada.
Sumala ni Vincent Marikit, Assistant Chief sa Emergency Medical Services, ilang naabtan ang biktima nga naghigda na sa karsada dihang miabot sila sa lugar.
Diin ang babayeng pasahero sa sakyanan nga nakabangga maoy unang mitabang sa biktima pinaagi sa pagpugong sa pagdugo niini sa ulo. Ug gidala dayon ang biktima sa tambalanan alang sa dugang medikal nga pag-atiman.
Apan, sumala ni Marikit, semi-conscious na ang biktima sa dihang ilang gidala sa ospital ug pas-pas nga mikunhod ang iyang responsiveness, lakip na ang verbal, eye-opening ug motor responses.
Dugang pa ni Marikit, human sa ilang pagresponde,miadto sila sa barangay hall aron susihon ang CCTV footage ug masuta ang aktuwal nga panghitabo.
Sa inisyal nilang pagtan-aw sa CCTV, nakita nga naigo ang biktima sa walang bahin ubos sa ilokan nga parte sa iyang lawas apan wala nila matino ang eksaktong punto sa impact sa tiil niini.
Grabe usab ang pagdugo sa samad sa tiil sa biktima nga maoy usa sa ilang gitutokan sa paghatag og medical intervention. via Bombo Jemm Mayot
