Gikumpirma ni Davao City Accountant Vingelin Bajan nga ang taho sa Commission on Audit (COA) alang sa tuig 2022 naglista sa kantidad nga P938,512 isip kinatibuk-ang kompensasyon ni Bise Presidente Sara Duterte sa panahon nga siya nagserbisyo isip mayor sa Davao.
Hinuon, giklaro niya nga kini usa ka “gross” nga kantidad, tungod kay wala pa niini gikonsiderar ang mga adlaw nga si Duterte wala motunga o nag-leave nga walay sweldo.
Atol sa “cross-examination” nga gihimo sa pribadong piskal sa Kamara nga si Atty. Mae Divinagracia, gipahayag ni Bajan nga ang komputasyon gikan sa Human Resource Management Office (HRMO) ug gibase sa binulan nga sweldo sa kanhi mayor nga gipadaghan sa 12 ka bulan.
Samtang, gipunting usab ni Senator-Judge Erwin Tulfo nga ang Siyudad sa Davao adunay kinadak-ang confidential funds sa tibuok nasud sa panahon nga nagserbisyo isip mayor si Bise Presidente Sara Duterte, nga gikatahong moabot sa P460 ka milyon matag tuig.
Matod ni Tulfo, kini nga kantidad mas dako pa kaysa sa confidential funds sa Quezon City ug Makati City.
