Nakatala og Guinness World Record ang lima ka tuig nga iro nga Labrador Retriever sa Missouri, USA human kini nakabitay og walo ka mga sipit o impit sa sinina sa usa ka hayhayan sulod sa usa ka minuto.
Ang itom nga Labrador nga ginganlag Java kay binuhi sa dog trainer nga si Lisa Rickards.
Ang pagsulay sa paghimo og rekord gipahigayon sa Kansas City. Sa wala pa siya nahimong iro nga nakahimo og rekord pinaagi sa iyang mga limbong o “tricks,” si Java gibansay unta aron mahimong “service dog” alang sa organisasyon nga Canine Companions.
Matod ni Rickards, sa unang 18 ka bulan sa kinabuhi ni Java, gibansay siya aron mahimong “service dog,” apan sa ulahi nakahukom sila nga dili siya angay alang sa maong programa. Tungod niini, gihatagan si Rickards og higayon nga sagopon pag-usab si Java isip iyang kaugalingong binuhi. Imbes nga hunongon ang pagbansay, gibalhin nila ang ilang atensyon ngadto sa mga isport alang sa mga iro ug nagkalain-laing mga limbong.
Sumala kang Rickards, si Java puno kaayo sa enerhiya ug ganahan nga makakat-on og mga bag-ong butang. Matod niya, maayo kaayo sila sa gitawag niya nga “social learning,” diin mag-obserbar si Java sa gibuhat sa usa ka tawo o laing iro, ug dayon mosulay sa paghunahuna kon unsaon usab kini pagbuhat.
Kini nga abilidad nakatabang kaniya sa pagkat-on sa talagsaong limbong—ang paggamit sa iyang baba aron magbutang og sipit sa sampayan—ug sa paghimo og usa ka world record.
