Gikatakdang mobiyahe paingon sa Malaysia ang Gilas Pilipinas karong Nobyembre 21 alang sa fifth window sa FIBA World Cup Asian Qualifiers.
Tumong sa sayong pagbiyahe nga mahatagan si head coach Tim Cone ug ang national team og hangtod lima ka adlaw aron maanad sa palibot sa Seremban City, lakip na sa dulaanan nga Karisma Arena.
Gilauman usab nga magpahigayon si Cone og mini-camp sa Malaysia aron mapalig-on ang panaghiusa ug preparasyon sa team alang sa ilang sunod nga mga duwa.
Sa Nobyembre 22, moapil sa team ang mga magdudula nga nakabase sa gawas sa nasud, lakip sila Dwight Ramos, AJ Edu ug Kevin Quiambao. Posible usab nga makaapil si Kai Sotto.
Gilauman usab ang pag-abot ni Bennie Boatwright, ang bag-ong naturalized player sa Pilipinas, aron moduwa alang sa Gilas.
Sa pagkakaron, adunay rekord nga upat ka daog ug upat ka pilde ang Gilas, nga nagbutang kanila sa ikalimang pwesto sa Group E.
Nanguna sa grupo ang Australia, gisundan sa New Zealand, Iran ug Jordan.
