Giangkon ni Gilas Pilipinas head coach Tim Cone ang iyang kasagmuyo human napildi ang pambansang koponan sa score nga 89-85 batok sa Bahrain sa pagsugod sa 20th Asian Games sa Aichi-Nagoya, Japan.
Matod ni Cone, layo ug wala makaabot sa iyang gilauman ang gipakitang duwa sa iyang mga magdudula.
Bisan pa sa maong kapildihan, dali nga nakabangon ang team ug nagpabiling malaumon nga makakuha og mga kadaugan sa ilang mga sunod nga sangka.
Gikatakdang makigsangka ang Gilas Pilipinas batok sa Kazakhstan unyang alas-6:00 sa gabii.
Nahisakop ang Pilipinas sa Group C, diin sila ug ang Kazakhstan parehong naghupot sa 0-1 nga win-loss record sa pagkakaron, samtang ang China ug Bahrain pareho nga adunay 1-0 nga rekord.
Subay sa format sa torneyo, ang nag-unang duha ka teams gikan sa matag grupo, kauban ang duha ka labing maayong “third-placed teams”, maoy makasulod sa quarterfinals.
Ang kapalaran sa Gilas magdepende sa ilang kadaugan batok sa Kazakhstan, ug sa gikinahanglan nga mapildi usab nila ang China sa ilang mga mosunod nga duwa.
Kon mapildi sa Gilas ang Kazakhstan, makakuha sila og 1-1 nga rekord nga magbutang kanila sa tabla nga pwesto sa modaog sa tali sa China ug Bahrain.
Apan kon mapildi sila sa Kazakhstan, kinahanglan gyud nilang pildihon ang China aron magpabilin ang tsansa nga makasulod isip ikatulo nga pwesto sa grupo.
