-- ADVERTISEMENT --

Dili pa mahuman ang Code of Conduct (COC) alang sa mga gikalalisang katubigan sa Southeast Asia, lakip ang West Philippine Sea, ubos sa pagpangulo sa Pilipinas atol niining ika-49 nga ASEAN Summit, ug gilauman na lang nga makompleto kini sa sunod nga summit sa Singapore sa 2027.

Sa usa ka press briefing, gipasabot ni Foreign Affairs Secretary Maria Theresa Lazaro nga anaa na sa 80 porsyento ang nahuman sa maong kasabutan.

Gidugnag niini, nga aduna pay mga sensitibong legal nga isyu ug managlahing baruganan tali sa 10 ka miyembro sa ASEAN ug China, lakip na ang posibleng pagpa-ratipikar niini sa mga kongreso sa pipila ka nasud.

Bisan tuod og wala kini mahuman sa pagpangulo sa Pilipinas karong 2026, giisip gihapon kini ni Lazaro nga usa ka dakong kalampusan tungod kay misaka ang kasabutan gikan sa 50 porsyento ngadto sa 80 porsyento, ug nagpasalamat siya sa kooperasyon sa China ug Malaysia isip co-chairs sa negosasyon.

Mahinungdanon ang COC tungod kay magbutang kini og klarong mga lagda aron malikayan ang tensyon ug komprontasyon sa rehiyon diin nagsapaw-sapaw ang pag-angkon sa teritoryo sa Pilipinas, China, ug uban pang mga nasud.

-- ADVERTISEMENT --