Gihagit ni House prosecution panel member ug Manila Representative Joel Chua ang kampo ni Vice President Sara Duterte nga ipasabot ang giingong mga remittances gikan sa China nga mokabat sa P319 milyon, ingon man ang mga transaksyon sa panalapi nga moabot sa P4.4 bilyon nga nalambigit sa magtiayong Duterte-Carpio ug sa ilang mga negosyo.
Matod ni Rep. Chua, kini ang mas mahinungdanong mga isyu nga angay tubagon sa depensa taliwala sa proseso sa impeachment batok sa Bise Presidente.
Basi sa testimonya sa Anti-Money Laundering Council (AMLC), ang Cale88 Foods Corporation—diin ang bana ni VP Sara nga si Atty. Manases Carpio adunay 47.5 porsyento nga bahin—giingong nakadawat og kapin sa P319 milyon nga mga remitans gikan sa mainland China ug Hong Kong.
Ang mga taho sa AMLC nagdetalye usab sa gibana-banang P4.4 bilyon nga kinatibuk-ang kantidad sa mga transaksyon nga nahitabo tali sa 2007 ug 2025, nga naglambigit kang Duterte ug Carpio.
Gikuwestiyon ni Chua kon nganong ang mga saksi sa depensa nagpunting lamang sa pagpasabot sa mga galastuhan alang sa pagkaon sa Japan ug sa pagpalit og mga sapatos nga nagkantidad og 200,000 pesos, imbes nga tubagon kining mas dagkong mga transaksyon.
Dugang pa niya nga wala pa makahimo ang depensa sa pagpanghimakak sa mga pasangil sa prosekusyon, lakip na ang mga isyu mahitungod sa bahandi sa Bise Presidente nga wala mahatagi og katin-awan.











