Gidismantle sa National Bureau of Investigation o NBI ug Presidential Anti-Organized Crime Commission o PAOCC ang giingong dakong online scam hub nga nag-operate sa probinsya sa Bohol.
Sa managlahing operasyon niadtong November 10 ug 11, nadakpan sa mga otoridad ang 31 ka Chinese national nga gidudahang nagpadagan sa mga online love scam ug investment scam pinaagi sa mga peke nga identidad sa social media ug cryptocurrency investment schemes.
Gibanabana nga ang giingong scam network nagpadagan og 10 milyon dollars o kapin sa 600-milyon pesos.
Gipatuman ang mga raid sa upat ka magkakonektar nga lugar sa mga munisipalidad sa Panglao ug Dauis, diin nakit-an nga gigamit ang ubang mga establisemento ingong sentro sa illegal nga online operations.
Sumala kang Police Major Joseph Lopena, spokesperson sa PNP Bohol, una nang naghimo og surveillance ang mga intelligence agencies aron mapamatud-an ang gidudahang kalihokan sa mga langyaw.
Giberipikar sa mga awtoridad ang mga IP address ug URL nga gigamit sa online operations aron matino ang mga lugar nga gikanan sa illegal nga mga transaksyon.
Human makuha ang mga impormasyon, gipadayon ang pag-surveillance sa mga natumbok nga lugar sa wala pa gipatuman ang operasyon.
Gipatin-aw ni Lopena nga dili tanan sa mga gi-raid nga establisemento kay aktuwal nga resort.
Sa pag-imbestigar sa mga otoridad, nakit-an nga gigamit sa mga suspek ang mga computer sets ug uban pang electronic devices sa pagpadagan sa giingong love scam ug investment scam.
Lakip sa mga nakumpiskar sa operasyon ang gatosan ka electronic devices, computer sets, mobile phones, SIM cards, extension wires, mga dokumento, cryptocurrency records ug mga script nga gigamit sa pagpangilad.











