-- ADVERTISEMENT --

Gitun-an sa Kagamhanan sa Dakbayan sa Sugbo kon kinahanglan ba nila ang deklarasyon sa state of imminent disaster aron pondohan ang mga pagpangandam niini alang sa nagkagrabe nga El Niño phenomenon.

Sigon ni Kenneth Siasar, chief of staff ni Cebu City Mayor Nestor Archival, nga ang disaster management team nagsusi kon ang gisugyot nga mga interbensyon mahimong ipadayon ubos sa kasamtangang mga lakang sa pagpangandam o magkinahanglan og pormal nga deklarasyon.

Samtang si Konsehal David Tumulak miduso og resolusyon nga nag-awhag kang Archival nga mandoan ang mga opisina sa siyudad sa pagpatuman sa mga lakang sa pagpugong, nga nagtumbok sa mga hulga sa suplay sa tubig, panglawas sa publiko, agrikultura ug seguridad sa pagkaon.

Tumong sa maong resolusyon mao ang panawagan alang sa koordinasyon uban sa mga ahensya sa nasudnong gobyerno ug sa Metropolitan Cebu Water District (MCWD), uban ang mas hugot nga pagmonitor sa presyo ug pagtimbang-timbang sa posibilidad sa pagpatuman og price control sa mga batakang palaliton ug mga importanteng tambal.

Matod ni Siasar, base sa inisyal nga imbentaryo, adunay 500 ngadto sa 600 ka mga atabay (artesian wells); anaa sa 70 niini ang kinahanglan pang ayuhon, samtang ubos sa 20 ang dili na magamit.

-- ADVERTISEMENT --

Kasamtangang nag-revalidate ang City Disaster Risk Reduction and Management Office sa maong imbentaryo tungod kay dili tanang atabay naghatag og tubig nga luwas imnon. Dugang pa, kapin sa 50 ka mga water station sa mga barangay ang kasamtangang giayo ug gikatakdang susihon o i-assess sa dili pa ang Disyembre 15.

Gitinguha sa Siyudad ug sa MCWD nga magbukas og mga pasilidad alang sa river-water extraction, lakip na ang mga treatment facilities sa Barangay Pari-an ug Bonbon sa dili pa ang Disyembre 10.