-- ADVERTISEMENT --

Naglatid sa nagkadaiyang accomplishment ang Kagamhanan sa Barangay Mabolo sa Cebu City atol sa ilang State of the Barangay Address o SOBA nga gipahigayon kagahapon, diin gipasiugda ang mga programa sa barangay alang sa edukasyon, panglawas, kaluwasan ug pagpanalipod sa kalikupan.

Lakip sa mga accomplishment nga gipresentar ni Atty. Daniel Frances Arguedo, ang Kapitan sa Barangay Mabolo, ang scholarship program sa barangay, diin anaa na sa 300 ka scholars ang nakabenepisyo sa maong programa.

Ubos sa scholarship assistance, matag college scholar makadawat og allowance nga 3-thousand pesos matag bulan, o katumbas sa 18-thousand pesos matag semester, nga gitumong aron makatabang sa pinansyal nga panginahanglan sa mga estudyante sa ilang pag-eskwela.

Sa sektor sa panglawas, gipasiugda usab ang paghatag og serbisyo pinaagi sa duha ka doktor nga nagserbisyo sa barangay, lakip ang paghatag og free medicines ug vitamins ngadto sa mga residente nga nanginahanglan.

Sa public safety, padayon usab ang road clearing operations sa barangay, ilabina sa mga interior road, aron masiguro nga dili mababagan ang agianan sa emergency vehicles ug mas paspas ang pagresponde sa mga emerhensiya.

-- ADVERTISEMENT --

Gipasiugda usab ang zero fire incident nga na-record ubos sa ilang termino, ingon man ang pagpatuman sa curfew ug escort operations sa mga Barangay Public Safety Officers o BPSO.

Giila usab ang pipila ka BPSO tungod sa ilang pag-apil sa hot pursuit operations, diin lakip sa ilang mga nahimo ang pagdakop sa suspek sa pagpatay sa iyang asawa sulod sa simbahan sa Liloan niadtong miaging tuig.

Samtang sa waste management, adunay na karon 10 ka waste management sites ang Barangay Mabolo, ug target nilang mapalapdan kini ngadto sa 22 ka sites, nga katumbas sa 22 ka sitio sa barangay.

Matod ni Arguedo, ilang paningkamot nga halos tanang klase sa basura dili na moabot sa landfill, busa giawhag ang mga residente nga hipuson ug dili sagad nga ilabay ang maong mga materyal, tungod kay adunay posibilidad nga mapahimuslan pa kini sa ilang waste management initiatives.