Cebu City– Ang pagkawagtang sa tropa sa Philippine Army sa syudad sa Guihulngan maoy nakitang rason ni Guihulngan City Acting Mayor Ernesto Reyes sa nahitabong pagpamanhig sa mga kapulisan nga gikamatay sa 6 ka mga pulis ug usa ka sibilyan sa maong syudad.
Matud ni Reyes nga sukad nga gi-pull out ang 79th IB sa McKinley Guihulngan, wala nay nagpatrolya sa mga bukirang bahin sa syudad ug sa mga kasikbit nga mga lungsod nga gituohang kuta sa mga rebeldeng grupo nga New People’s Army kon NPA. Mipadayag usab kini sa iyang kasagmuyo human nga wala sila pahibaw-a sa pagpull out sa tropa sa army aron ipadala sa Mindanao.
Subay niini, nanawagan kini sa pamunuan sa Philippine Army nga kung mahimo ibalik ang tropa sa ilang lugar aron nga makatabang sa pagpatrolya hilabi na og usa ang Guihulngan City sa mga na identify nga NPA infested area sa Visayas.
Samtang misaad si Reyes nga ang syudad sa Guihulngan ang muhatag og 50 mil pesos ngadto na sa mga pamilya sa namatay nga mga pulis.
