Gitataw ni Jill Marie Duero, Focal for Adjustment Measures Program (AMP) sa Department of Labor and Employment Region 7 (DOLE 7), ang bahin sa Adjustment Measures Program (AMP) sa ilang departamento nga nakatutok sa pagtabang sa mga Micro, Small, and Medium Enterprises (MSMEs).
Matud pa niya, kini nga programa usa ka proaktibong lakang gikan sa mga ahensya sa gobyerno aron maandaman ug matabangan ang mga trabahante, negosyo, ug mga kompanya nga posibleng maapektuhan sa gitawag nga economic disruption.
Gipasabot ni Duero nga ang maong suporta gidisenyo dili lamang para sa katungdanan ug kaayohan sa mga empleyado kundili para sa tibuok enterprise o kompanya.
Sumala sa gipagawas nga datos ni Duero, nagsugod ang pagpatuman sa maong programa sa tuig 2024, diin nakahatag sila og hinabang sa mga 6 enterprises sa probinsya sa Cebu nga nagkantidad ug duha ka 4.7 milyon ka pesos.
Pag-abot sa tuig 2025, misaka ang ihap sa nakadawat ug tabang ngadto sa 16 ka enterprises, apil na ang gikan sa Negros Oriental, diin moabot sa 10 milyon ka pesos ang kinatibuk-ang pondo nga napagawas para sa tabang.
Para sa kasamtangang tuig 2026, gibutyag ni Duero nga bisan medyo gamay pa ang ihap sa karon, aduna silay mga carry-over gikan sa nangaging mga pagsulay ug mga training. Pinaagi sa padayon nga pagbansay ug suporta, naningkamot gihapon ang ilang buhatan nga makatabang sa dugang nga mga negosyo ug enterprise sa rehiyon.
