Gitubag sa Armed Forces of the Philippines (AFP) ang giingong sayop nga interpretasyon sa pamahayag ni AFP Chief of Staff General Romeo Brawner Jr. bahin sa temporaryo nga pag-deploy sa Typhon missile system sa Estados Unidos sa nasud.
Kini nahitabo human giakusahan ni Davao Rep. Paolo “Pulong” Duterte si Brawner nga giingong nanghambog bahin sa abilidad sa missile system nga makaabot sa China, ug giakusahan siya nga nagsugal sa kinabuhi sa mga Pilipino baylo sa usa ka alyansa sa Amerika.
Sa usa ka pamahayag, giklaro ni Gen. Brawner, nga naghatag lamang siya og teknikal nga impormasyon ug gipasabot nga ang presensya sa missile system alang sa pagbansay ug pagpalambo sa kapabilidad isip kabahin sa programa sa modernisasyon sa AFP.
Hugot usab nga gihimakak sa AFP nga kini adunay bias sa mga langyaw nga interes, ug giinsistir nga ang tanan nga mga inisyatibo ug pakiglambigit sa depensa nahiuyon sa independent foreign policy sa Pilipinas.
Nanawagan usab ang AFP sa mga opisyal ug mga lider nga mag-amping sa ilang mga pamahayag aron dili mokaylap ang sayop nga impormasyon o kawalay pagsalig sa militar.
Gipasalig sa AFP nga matinud-anon kini sa ilang katungdanan nga alagaran ang katawhang Pilipino, ug panalipdan ang Pilipinas.
