Gitun-an karon sa Armed Forces of the Philippines (AFP) ang posibleng pagwagtang sa binuwan nga pension sa mga retiradong opisyal taliwa sa mga taho nga dunay mga retirado nga nanawagan sa militar nga bawion ang suporta kang Presidente Ferdinand “Bongbong” Marcos Jr.
Sa press briefing niadtong Sabado, Oktubre 18, gipangutana ang tigpamaba sa AFP nga si Col. Francel Margareth Padilla kung posible ba nga mawala ang ilang binuwan nga pensyon sa mga retiradong opisyal nunot sa maong panawagan.
Gitubag kini ni Padilla nga kung ang legal channel makasuta niini kay ila kining sundon.
Giingon usab sa opisyal sa AFP nga ang mga pahayag nga nag-aghat sa sedisyon ug nagpakaylap sa peke nga balita adunay ligal nga sangputanan.
Gipasabot ni Col. Padilla nga ang mga retiradong opisyal kay anaa na sa civilian category apan tungod kay nagdawatay kini og pension kay ilaha pa kining gitun-an.
Samtang si Philippine Navy Rear Admiral Roy Vincent Trinidad niingon nga ang pinakataas nga retiradong opisyal sa militar nga ilang gimonitor nga nagpakatap og fake news mao ang usa ka two-star general nga nagdawatan og binuwan nga pension nga P160,000.
Matod niya nga gitun-an sa mga legal officer sa AFP ang tulubagon sa pagdawat og pensyon gikan sa gobyerno.
Kahinumdoman nga mismo si AFP chief-of-staff Gen Romeo Brawner Jr., miangkon kaniadto nga daghang mga retiradong opisyal sa militar ang nanawagan nga bawion ang suporta sa Presidente taliwala sa mga nabutyag nga anomaliya sa mga proyekto sa flood control, apan gisupak kini sa hepe sa AFP ug busa wala kini mapatuman.
