Mibatikos ang Akbayan Partylist kang Senator Robin Padilla kalabot sa iyang giduso nga balaodnon nga ipaubos ang edad sa criminal responsibility gikan sa 15 anyos ngadto sa 10 anyos, human sa nahitabong duguong pagpamusil sa San Jose National High School sa Tacloban City.
Ang maong insidente niadtong Hunyo 22 nikalas sa kinabuhi sa tulo ka estudyante, diin duha ka menor de edad nga suspetsado ang gitumbok nga naghimo sa krimen.
Pinaagi sa usa ka pamahayag sa social media, gipadayag ni Akbayan Party-list President Rafaela David nga daw gipahimuslan sa senador ang trahedya aron iduso ang maong sugyot nga ilang hugot nga gitutulan.
Matod pa ni David, buot prisohon ni Padilla ang mga 10 anyos apan iyang gipagawas si Senator Ronald “Bato” dela Rosa nga giingong akusadong nangulo sa kadaghanan, ug iyang gikuwestiyon kon unsa nga matang sa panghunahuna kini.
Gisaway sa grupo ang maong lakang ug ilang gipasiugda nga ang pagpapriso sa mga bata dili epektibong paagi sa rehabilitasyon tungod kay wala pa hingpit nga naugmad ang ilang pagsabot sa husto ug sayop.
Nagpadayag usab og pahasubo ang Akbayan sa mga pamilya sa biktima, apan nanawagan sila nga dili gamiton ang trahedya isip basehan sa mga patakaran nga makahatag og mas dakong kadaot sa mga kabataan ug sa komunidad.
