Gisugdan na sa Philippine National Police (PNP) ang pagdawat sa mga armas gikan sa nagtago-tago nga si Senador Ronald “Bato” Dela Rosa human gi-rebook sa PNP Firearms and Explosives Office (FEO) ang iyang License to Own and Possess Firearms (LTOPF) ug ang mga rehistro sa iyang kabtangan.
Sumala sa tigpamaba sa PNP Public Information Office nga si PCol. Allen Rae Co, miabot na sa 26 ka armas ang ilang nakolekta, 20 niini ang gitugyan didto sa Davao samtang ang unom gikan sa Region 4.
Bisan pa man niini, nagpabilin gihapon nga unaccounted o wala pa makuha ang 91 ka armas gikan sa kinatibuk-ang 117 nga nakarehistro ubos sa ngalan sa senador.
Tungod niini, padayon ang pakig-alayon sa FEO sa pamilya ni Dela Rosa ug nagpasidaan nga ang legal nga aksyon sa pulisya ang mopatigbabaw aron mabawi ang tanan nga nahabilin nga mga armas.
Gawas sa pagkarekober sa mga armas, ang kapulisan nagpahigayon usab og walay hunong nga pagpangita aron isilbi ang warrant of arrest sa senador, kinsa gipangita karon may kalabotan sa warrant of arrest nga gi-isyu sa International Criminal Court (ICC) kabahin sa mga crimes against humanity atol sa drug war sa administrasyong Duterte.
Bisan dili ipagawas sa PNP ang katapusang lokasyon ni Dela Rosa aron dili mabalda ang posisyon ug kahimtang sa ilang mga miyembro, gipasalig ni Co nga base sa ilang pinakabag-ong impormasyon, ang senador naa pa sa sulod sa Pilipinas.
Nagtuo usab ang pulisya nga walay makapugong sa ilang kapilian, tigpanalipod man kini o uban pang babag, ug ilang gipahayag nga ang ilang mga operasyon magpadayon ug walay kakapoy hangtod nga maserbi ang warrant.
