Gipaniguro na ang puwesto ni Alas Pilipinas sa semifinals sa Asian Volleyball Confederation Challenge Cup nga gipahigayon karon sa Manila gikan Mayo 22 hangtod Mayo 29, 2024.
Kini human gipildi sa women’s volleyball national team ang Iran, India, ug Australia sa pool A sa torneyo.
Ang Alas Pilipinas midaog batok sa Iran sa tulo ka sunodsunod nga sets sa iskor nga 25-16, 25-13, ug 25-15.
Gipildi sa Alas Pilipinas ang India sa upat ka sets sa iskor nga 22-25, 25-21, 25-17, ug 25-18.
Sa ilang unang duwa sa AVC Challenge Cup, ilang gipildi ang Australia sulod sa 4 ka sets sa iskor nga 22-25, 25-19, 25-16, ug 25-21.
Gumikan niini, misaka sab ang Pilipinas sa World Ranking sa women’s volleyball gikan sa ika-63 nga puwesto ngadto sa ika-57 nga puwesto.
Sa kasamtangang standing sa Pool A ug Pool B, posibleng makigsangka ang Kazakhstan sa Alas Pilipinas sa semifinals karong Mayo 28, 2024 sa Rizal Memorial Coliseum.
Mao ni ang labing maayong finish sa Philippine Women’s Volleyball national team sa AVC sanglit naa ra kini sa ika-7 nga puwesto sa miaging tuig.
Ang team captain-setter nga si Jia De Guzman ug libero Dawn Macandili-Catindig maoy nangulo sa grupo. Lakip usab niini ang pipila ka UAAP standout players Angel Canino ug Thea Gagate.
