Nagpahigayon og “All Vendors Forum” ang mga nagkadaiyang manindahay sa merkado sa Carbon sa tinguha niining maduso ang three-point agenda nila sa Cebu City Sports Institute sa Barangay Sawang Calero ning dakbayan sa Sugbo kagahapong adlawa sa Huwebes, Hunyo 12, 2025.
Naglakip sa ilang three-point agenda ang pagdeklarar sa Carbon Market isip Cultural Heritage Site, pagpasar og ordinansa nga naprotektar sa panginabuhian sa mga manindahay, ug sa pag-review sa joint venture agreement tali sa kagamhanang dakbayan ug pribadong kumpanyang Megawide.
Gitambongan ang maong kalihokan nila ni Incoming Cebu City Mayor Nestor Archival Sr., Incoming Vice Mayor Tomas “Tommy” Osmeña, Incoming City Councilor Nice Archival ug Bebs Andales.
Aktibong gipangulohan ni Mayor Archival ang maong forum nga nagpasiugda sa pamulong sa mga pangutana sa mga manindahay sa Carbon sa katin-awan sa development niini kung aduna pa ba sila kaugmaon sa ilang pwesto.
Sa pamulong ni Archival, gisaysay niini ang ang merkadong Carbon kay dili lang luna ug istruktura apan nahimo kining bililhon tungod sa mga Sugboanon nga nagtukod sa ilang panginabuhian sukad pa sa nakalabayng pipila ka henerasyon.
Gani sa pikas bahin, sa eksklusibong pakighinabi sa Bombo Radyo Cebu Newsteam kang Ann Ariosa, ang Chairperson sa Carbohanong Alyansa (usa sa mga grupo sa manindahay sa Carbon Market) diin gisaysay niini nga sugyot nila na ilakip permi sa mga kasabutan sa kalambuan sa Carbon Market ang mga manindahay sukwahi sa ilang nasinati nga pagpangdaog-daog sa mga nakalabayng administrasyon sa pagpirma niini og kasabutan sa pag-privatize niini.
Gitawag niini ang All Vendors Forum nga kalampusan nilang mga manindahay sa merkadong Carbon sa pagpaminaw sa umaabot administrasyong Archival sa kagamhanang dakbayan sa ilang sugyot nga kalambuan nga walay mabiyaan.
