NAGA CITY, CEBU-Gipasakahan nag kaso ang usa ka Amahan sa Dakbayan sa Naga human nga nangulata sa iyahang kaugalingung anak sa Purok Tusyfo, Brgy. Tuyan,sa Naga,Cebu niadtong Sabado, June 22, 2024.
Atol sa pakighinabi sa Bombo Newsteam kang Police Lieutenant Colonel William Ceda Homoc, ang hepe sa kapulisan sa Dakbayan sa Naga, gitino niini nga gidagmalan sa 35 anyos nga amahan ang iyahang anak nga 9-anyos gumikan kay nakaguba kini sa iyahang cellphone.
Dugang pa, nga dili kini ang unang higayun nga manapat ang amahan sa anak, hinungdan nga ang bata inubanan sa iyahang apohan mipasaka gyud ug kaso sa iyahang amahan.
Nasuta usab nga ang inahan sa bata usa ka Overseas Filipino Worker (OFW), hinungdan nga ang apohan sa biktima maoy nireport sa estasyon sa kapolisan diin gisaysay niini ang pagpangulata sa apo niining 9 anyos nga lalaki sulod mismo sa ilahang balay.
Gisaysay sa apohan nga gisumbag sa amahan ang bata sa nawong ug sa tiyan ug gibunalag silhig tukog sa makadaghang higayon.
Una niini, gidakop sa kapolisan ang suspek nga amahan nga giilang si Marker Villasencio Fernandez, 35 anyos, adunay live-in partner ug residenti sa naasoy nga lugar.
Kinsa nag-atubang sa kaso nga ‘physical abuse and physical injury in-relation to republic act 7610’.
Nasuta usab sa kapulisan nga bag-o pang nakagawas ang amahan sa prisohan nga may kalabutan sa Drugs.
