CEBU CITY – Gikatakdang mopasaka ang pamilya og kasong incestious rape ug acts of lasciviousness batok sa amahan sa Talisay City.
Kini human nga gipasanginlan ang suspek nga si Ernesto Dejamo, 50 anyos, nga giingong nagmolestiya sa 7 niyang mga anak sulod sa ilang panimalay sa Brgy. Jaclupan, sa nahisgutang syudad.
Matud ni Police Major Ardy Cabagnot, ang deputy chief sa Talisay City Police Station nga unang nadakpan si Dejamo gumikan sa ilegal nga paghupot og armas niadtong Huwebes, Mayo 16.
Apan midangop dayon ang mga anak niini sa buhatan sa kapulisan ug diha na gisugilon ang giingong pagmolestiya.
Gibutyag ni Major Cabagnot nga gituohang gilugos sa amahan ang 4 ka mga babayeng anak ug giduwa-duwaan sa 3 ka mga lalaking anak ang kinatawo sa amahan.
Dugang pa ni Cabagnot nga nakahigayon si Dejamo sa maong binuhatan sa makadaghang higayon kung molakaw ang inahan niini.
Apan hugtanong gihimakak sa amahan ang pasangil sa iyang mga anak.
Nasayran nga walay trabaho si Dejamo samtang adunay ginagmay nga negosyo ang iyang asawa.
Desididong mopasaka og kaso ang inahan sa 7 ka mga anak human nasayud sa binuhatan sa amahan.
Matud usab ni Cabagnot nga palawuman usab ang imbestigasyon niini kung tiggamitan ba si Dejamo og ginadiling drugas.
Nabalhog si Dejamo sa lock-up cell sa Talisay Police Station samtang anaa sa kustodiya sa DSWD ang mga anak niini.
