CEBU CITY – Nahuman na sa kagamhanan sa dakbayan sa Sugbo ang pagpangandam alang sa laing hugna sa pagpatuman sa “National Vaccination Days” nga gikatakda gikan sa Pebrero 10 hangtod 12, 2022.
Kini gumikan nakig-alayon na si Doctor Jeffrey Ibones, Officer-in-charge sa City Health Department (CHD), sa lain-laing sektor alang sa massive vaccination drive sa dakbayan.
Nasayran nga gamiton sa syudad ang anaa sa 36 ngadto sa 37 ka lain-laing mga dapit isip venue alang sa tulo ka adlaw nga pagpamakuna.
Adunay gikinahanglan nga mga kapanguhaan sama sa manpower, kagamitan, ug suplay sa bakuna ang maong mga lugar.
Atol sa ikaduhang hugna sa pagpamakuna nga sugdan karong Huwebes, gitaganhan na og kaugalingong storage facility ang matag usa sa mga vaccination site aron ang mga bakuna ma-deliver dayon sa eskedyul.
Ipagawas na sa CHD ang katapusang mga detalye alang sa National Vax Days sa dili madugay.
