Gipamatud-an ni Anton “The Dragon” Raga ang iyang kaabtik sa bilyar human gidominar ang Sharks Billiards Association (SBA) Philippine Open niadtong Domingo sa gabii Sharks Arena and Sports Bar sa Tomas Morato, Quezon City.
Gipildi sa 28-anyos nga Sugbuanon nga taga Talisay si Jerico “Panday” Bañares sa iskor nga 13-7 sa race-to-13 championship match sa prestihiyosong duwa nga nagpakita sa labing maayong bilyarista sa nasod.
Matod sa founder ug commissioner sa SBA nga si Hadley Mariano, ang kalamposan ni Raga kay pamatuod sa padayong pagsaka sa lebel sa bilyar sa Pilipinas.
Tungod sa iyang gipakita nga kahanas kay nakadawat si Raga og P400,000 isip premyo, samtang si Bañares nakadawat og P150,000, ingon man nga gihatagan usab sila og mga tropeyo.
