CEBU CITY- Gihatagan karon og prayoridad ni Cebu City Mayor Nestor Archival ang mga bukirang barangay sa Dakbayan sa Sugbo, ubos sa hingpit nga pagpangandam sa umaabot nga Bagyong UWAN, nga nakaapekto na sa syudad pinaagi sa Tropical Wind Cyclone Signal No. 1 gahapong adlawa, Nobyembre 7.
Gikabutyag ni Archival nga karon, mas gitagaan niya og dakong pagtagad ang pagpanghawan sa mga dalan sa bukirang bahin sa Sugbo aron kini hingpit nga ma-passable, aron sa panahon sa emehensya, dali ra ang paghatud sa mga gikinahanglan sa mga residente.
Sa eksklusibong pakighinabi sa Bombo Radyo Cebu, gibutyag ni Archival, nga magpabiling naka-standby ang mga response team ug disaster teams sa matag barangay, samtang naningkamot sila sa constant communication aron walay maulahi sa tabang.
Nahisgutan usab sa mayor ang kalisud nga ilang naagian sa bagyong Tino, diin naglisud sila sa komunikasyon.
Busa, nanghinaot kini nga ang Bagyong UWAN dili magbilin og dako ug lapad nga kadaut, apan bisan pa man, nagfocus gihapon sila sa pag-stock sa mga gikinahanglanon nga relief goods.
Subay niini, miapil usab ang mayor sa meeting sa DSWD ug kang President Marcos, diin nabutyag nga adunay ipanghatag nga cash assistance sa mga biktima nga nawad-an og panimalay.
