CEBU CITY — Natanggong sa prisuhan ang 37-anyos nga asawa ug ang gituohang kabit niini human maabtan nga nag-uban sulod sa usa ka lodging house sa Brgy. Calajoan, Minglanilla, Cebu.
Gisikop sa kapulisan ang dinakpan nga si Divina Yunson, residente sa Brgy. Cadulawan sa maong lungsod, ug ang giingong uyab-uyab niining si John Rey Cervantes, 31 anyos, nga taga-Naga City.
Una niini, midangop sa buhatan sa Minglanilla Police Station ang 42-anyos nga bana nga si Zaldy Yunson human masayud nga nagkuyog ang duha padung sa usa ka lodging house.
Hinungdan nga miresponde ang kapulisan sa maong balay-pahulayan ug naabtan nga nag-ilis ang duha human sa ilang pagpakighilawas.
Matud ni Police Master Sergeant Junel Ater sa Minglanilla Police Station nga wala nagkasinabot ang magtiayon sa ilang pagpuyo hinungdan nga, matud pa, nakakita ang asawa og laing lalaki.
Nasayran nga adunay pito ka mga anak ang maong magtiayon.
Pursigido ang bana nga mopasaka og kasong adultery batok sa iyang asawa ug andam usab kining atubangon.
