BOHOL PROVINCE – Walay angayan nga ikabalaka. Kini ang mensahe ni Bohol Governor Edgar Chatto human nga napatay sa mga otoridad ang mga miyembro sa Abu Sayyaf Group nga nakasulod sa Brgy Napo, lungsod sa Inabangga probinsiya sa Bohol nga gikamatay sa tulo ka mga miyembro sa AFP ug usa ka miyembro sa PNP.
Matud ni Chatto nga ang nahisgutang engkwentro dili makaapekto sa lungsod sa Inabannga gumikan kay nakontrolar na kini sa mga otoridad arun nga dili na makasulod sa lain pang dapit ang mga terorista.
Dugang pa sa gobernador nga magpadayon sa gihapon ang ASEAN meetings sa Bohol nga ipahigayon karung Abril 19 hangtud Abril 22 lakip na ang ilahang piyesta.
Gilauman nga anaa sa kapin 4 ka libo nga mga security personnel ang ipakatap sa Bohol atol sa ASEAN Summit.
Gisiguro ni Chatto nga gawas sa mga otoridad hayan mas mabinantayon na ang mga Bol-anon ilabi na nga nakasulod na gayud sa ilahang lugar ang mga Abu Sayyaf.
Lakip sa gisiguro sa gobernador nga hatagan og tabang ang mga liboan ka mga residente nga gipabakwit subay sa nahitabong binakbakay.
Samtang gimandoan na usab ni Cebu Governor Hilario Davide III ang tanang mga mayor sa nagkadaiyang munisipalidad sa probinsiya sa Sugbo ilabi na niadtong mga lugar nga kadaghanan bisitahon sa mga turista nga mas magbinantayon ug siguradohon ang kaluwasan sa mga turista ug mga konstituwente.
Kahinumdoman nga sa wala pa ang engkwentro sa Bohol, mipagawas na og advisory ang US Embassy sa ilahang citizens sa hulga sa pagpangdagit sa teroristang grupo sa Central Visayas partikular na sa Bohol ug Cebu nga gisundan usab karun og advisory sa nasud nga Australia ug Canada.
Sa pagkakarun nagpabilin ang hugot nga seguridad sa mga point of entry and exit sa probinsiya sa Bohol ug Cebu.
