CEBU CITY- Padayon pa nga giila sa Kapulisan ang usa ka babaye nga napalgang patay sa kadagatan duol sa taytayan nga nagbulag sa dakbayan sa Sugbo ug Talisay sa may South Road Properties (SRP) Martes, Nobyembre 19, 2024.
Gisusi na sa Scene of the Crime Operatives (Soco) sa dakbayan sa Sugbo ang patay’ng lawas.
Matod sa pipila ka mga saksi, usa ka sakyanan ang mihunong sa duol, ug adunay nikanaug ug giguyod ang lawas ug gilabay sa dagat ganihang kadlawon.
Sa pikas bahin, gitino ni Police Major Efren Diaz Jr., hepe sa Mambaling Police Station,nga wala pa nila mailhi ang babaye nga napalgang patay duol sa seawall sa South Road Properties sa dakbayan sa Sugbo.
Dugang niini, nga ang biktima gibana-banang nagpangidaron og anaa sa baynte anyos.
Kini nagsul-ob og itom nga sinina og itom nga skinny jeans nga susama og panamit sa usa ka service crew.
Aron mailhan ang biktima, giawhag ni Diaz ang mga indibidwal nga adunay nawala nga mga miyembro sa pamilya nga mobisita sa istasyon sa pulisya.
