CEBU – Isip usa ka tin-edyer, dili malikayan nga ganahan mogamit sa social media ang 18-anyos nga si Joanna Sisracon.
Apan sa wala pa kini ma-enganyo nga mag-post og mga video, nagtigom una kini og kaisog ilabi na nga adunay dakong pilas nga nahabilin sa iyang nawong usa ka trahedya.
Kini human niadtong lima pa kini ka buwan nasunog kini sa gas.
Bisan tuod swerte nga naluwas, nakahatag kini kaniya og lain nga matang sa sakit samtang nagdako tungod sa kadako sa uwat nga anaa sa iyahang nawng nga bisan ang iyang mga paryente kanunay siyang bugalbugalan.
Apan wala mosugot si Joana sa hukom sa uban, naghunahuna lang kini nga dunay rason ang Diyos sa nahitabo kaniya ug inanay niyang gidawat ang kapalaran nga midangat kaniya.
Namaligya og sinina online si Joana aron makatabang sa panimalay ug didto na nagsugod ang interes sa social media hangtod sa magviral kini.
Nunot niini, laing maayong kahigayonan ang niabot sa dalaga sa dihang gikuha kini isip endorser sa social media sa usa ka cosmetics company dinhi sa Pilipinas nga gikalipay pag ayo sa dalaga.
