MANDAUE CITY,CEBU- Pormal nang nanumpa ang mga bag-ong tinudlo ni Mandaue City Mayor Thadeo Jovito “Jonkie” Ouano sa Mandaue City College (MCC) Board of Trustees sa Mandaue City Hall Mayor’s Office niadtong Biyernes, Agosto 1, 2025.
Gitudlo niini isip Vice-Chairman sa MCC-Board of Trustees si Dr. Laurencio M. Andrino, Jr. uban ang mga miyembro nga sila Chairperson of the Committee on Education Konsehal Atty. Joel M. Seno, Chairperson of the Committee on Local Finance Atty. Gonzalo D. Malig-on Jr., Presidente sa Association of Local Colleges and Universities Dr. Richel N. Bacaltos, Mandaue City College Faculty Association Member Ma. Kathrina P. Pananganan-Perido, Alumni President Lloyd Ancero, ug Supreme Student Council President Leah Mae Abad.
Tinguha sa mga opisyales ug faculty staff members nga mahatagan na og Institutional Recognition ang tunghaan gikan sa Commission on Higher Education aron masiguro ang paghatag og mas lig-ong suporta sa mga plano sa MCC.
Dugang pa nga ang kasamtangang administrasyon a dakbayan sa Mandaue nanghinaot nga makadalit og dekalidad nga edukasyon sa mga Mandauehanon diin pipila sa mga plano ang paggahin og dugang budget alang sa pasilidad sa tunghaan nga gitaganang masugdan sa tuig 2026.
