Cebu City-Gikabalaka ni Lanao Del Sur 2nd District Board Member Abdulhamid Amerbitor ang baho nga naggikan sa mga nadugta nga patay’ng lawas sa mga namatay sa nagpadayon nga engkwentro tali sa tropa sa gobyerno ug sa Maute terror group sa Marawi City.
Matud ni Board member Amerbitor nga hangtud karon wala gihapon nakuha ang mga patayng lawas nga nagkatag lamang sa mga lugar nga nahitabu-an sa engkwentro sanglit naglisod ang mga otoridad sa paghipos sa mga patayng lawas gumikan sa nagpadayon nga bakbakan. Tungud niini , nikatap na ang baho sa tibuok syudad og gikabalak-an nga makada-ot kini sa panglawas sa mga tawo.
Gibutyag pa niini nga gitinguha unta nilang mga Muslim nga bisag sila nalang ang manghipos sa mga patayng lawas apan dili sila dali nga makasulod sa mga lugar nga kontrolado sa Maute hilabi na og dako ang posibilidad nga ilugon sa terror group ang ilang mga sakyanan.
Subay niini nanawagan si Amerbitor sa mga militar nga kung mahimo, magtukod sila og grupo nga maoy manghipos sa mga patayng lawas aron nga dili namag-antus sa baho nga nagikan sa mga nagkatag nga patayng lawas ang mga tawo nga nagpabilin pa sa Marawi City.
Nanawagan usab og dugang pang mga hinabang para sa Marawi City si Lanao del sur 2nd Distic Board member Abdulhamid Amerbitor. Matud ni Amerbitor nga halos wala na silay makaon sa Marawi sanglit wala nay supply sa mga pagkaon sa mga tindahan og dili na usab makapangompra ang mga tindera gumikan sa kahadlok nga maipit sa nagpadayon nga engkwentro.
Dugang pa niini nga bisan ang supply gikan sa DSWD ang gikulang usab sanglit daghan kaayo ang mga naginahanglan og pagkaon. Gibutyag pa niini nga mas nabalaka kini sa mga taga Marawi nga dili mga Muslim tungud kay matud pa nga dili sila makasugakod sa kagutum , dili pareha sa mga Muslim nga anad sa fasting hilabi na og Ramadan karon. Gitataw pa sa maong board member nga dili na angayang tan-awon pa kung unsa ang tinuohan sa usa ka tawo tungud kay ang gikinahanglan karon nga magtinabangay sila hangtud nga mahuman ang kagubot sa ilang lugar.
Gawas sa pagkaon, problema usab sa Marawi ang kakulang sa mga doktor nga maoy muatiman sa mga nasamdan sa engkwentro. Matud ni Amerbitor nga halos sirado ang tanang hospital sa Marawi maong ang mga samdan wala gayud matagaan og atensyong medical. Subay niini, nanawagan kini sa Department of Health nga magpadala og tabang medisina sa ilang lugar aron matambalan ang mga nasamdan.
