Giaprobahan na sa House of Representatives of the Philippines ang ika-3 ug katapusang pagbasa sa House Bill No. 8418, nga maghatag og gahom kang Ferdinand “Bongbong” Marcos Jr. sa temporaryong pagpakunhod o pagsuspenso sa excise taxes sa mga produktong petrolyo atol sa nasudnon o pangkalibutanong krisis sa ekonomiya.
Diin ang balaodnon nakadawat og 247 ka boto nga pabor, tulo ang supak, ug walay abstention.
Sumala ni House Majority Leader Ferdinand Alexander “Sandro” Marcos, ang balaodnon nagtumong sa pagtabang dayon sa publiko kung mosaka ang presyo sa lana sa pangkalibutanong merkado, nga hinungdan sa pagtaas sa pletehan, presyo sa pagkaon, ug kuryente.
Ubos sa balaodnon, ang Presidente mahimong mo-waive hangtod sa P10 kada litro sa excise tax sa gasolina ug P6 sa diesel kung ang presyo sa krudo moabot o molapas sa $80 kada bariles o kung adunay gideklarar nga national emergency o kalamidad.
Ang pagsuspenso o pagkunhod sa buhis mahimong molungtad hangtod sa unom ka bulan, ug magamit sa Presidente kini nga gahum hangtod sa Disyembre 31, 2028.
Lakip sa mga mibotar batok niini mao sila si Kabataan PL Rep. Renee Co, Gabriela PL Rep. Sara Elago, ug ACT Teachers PL Antonio Tinio.
Gipahibalo ni Akbayan Party-list Rep. Chel Diokno nga mibotar siya pabor sa House Bill No. 8418, uban ang pasidaan ug panawagan alang sa mas lapad nga tabang sa mga sektor nga naapektuhan sa pagsaka sa presyo sa lana.
Sumala ni Diokno, gisuportahan nila ang balaodnon tungod kay ang pagsaka sa presyo sa lana hinungdan sa domino effect nga nagdugang sa gasto sa pagkaon, transportasyon, ug uban pang mga batakang panginahanglan.
Bisan pa, ang grupo miingon nga aduna silay duha ka pagduhaduha bahin sa balaodnon. Una, magpabilin silang mabinantayon sa paghatag og emergency powers sa Presidente. Ikaduha, ilang giinsistir nga ang pagsuspenso sa excise tax dili igo kung wala’y dayon nga tabang sa mga sektor nga grabeng naapektuhan.
Ang partido nagduso usab alang sa ubang mga lakang sama sa House Resolution No. 858 alang sa libreng sakay sa tren, House Resolution No. 873 aron mapalapdan ang subsidy sa gasolina sa mga delivery riders ug mga drayber sa tricycle, ug House Resolution No. 875 aron susihon ang Philippine Energy Plan.
Gipasabot ni Kabataan PL Rep. Renee Louise M. Co ang iyang boto batok sa House Bill No. 8418, nga naghatag gahum sa Presidente sa temporaryo nga pagpakunhod o pagsuspenso sa excise taxes sa mga produktong petrolyo.
Sumala ni Co, ang balaodnon wala magtubag sa hinungdan sa padayon nga pagsaka sa presyo sa lana, tungod kay kini limitado sa pagkunhod sa buhis ug dili sa mga pagbag-o sa palisiya sa sektor sa lana.
Miingon siya nga bisan kung ang presyo moubos og P6 ngadto sa P10 matag litro, dili gihapon sigurado nga mabati sa mga konsumidor ang epekto tungod kay ang sektor sa lana nagpabilin nga usa ka deregulated nga industriya.
Gipahayag usab niya nga walay igo nga transparency sa presyo sa lana, mao nga ang mga kompanya mahimong dili makapaambit sa gilauman nga pagkunhod sa presyo ngadto sa publiko.
Hinuon, ang magbabalaod miingon nga ilang giduso na ang usa ka balaodnon aron permanente nga wagtangon ang excise tax ug VAT sa lana ug mga batakang palaliton, uban sa mga panawagan alang sa mas estrikto nga mga regulasyon sa downstream oil industry, sentralisadong pagpamalit, ug pagpalig-on sa renewable energy aron makunhuran ang pagsalig sa nasud sa imported nga lana.
