CENTRAL VISAYAS- Wala matagbaw ang grupo nga Bagong Alyansang Makabayan (BAYAN) Central Visayas, sa kasamtangang Dagan sa nasud, ug nanawagan sa Presidente Ferdinand Marcos Jr. nga hatagan ug pagtagad ang mga nag-unang isyu sa nasud.
Giaghat sa grupo ang administrasyon nga maghatag og subay ug pormal nga pagpasabot kon asa napadulong ang bilyon-bilyong piso nga pondo alang sa mga flood control project, partikular na sa lalawigan ug dakbayan sa Cebu.
Kini ang gipasiugda ni Jaime Paglinawan, Chairman sa BAYAN Central Visayas, atol sa iyang pakighinabi sa Bombo News Team. Matod niya, nagpadayon gihapon ang grabe nga pagbaha matag adunay kusog nga ulan, nga nagpakita sa kakulang sa kaepektibo ug klarong resulta sa mga proyekto sa flood control.
Gipanawagan sa grupo ang dinalian nga pagpatuman sa probisyon alang sa makabuhing suholan (living wage) sa mga mamumuo aron makaapas sa padayong pagsaka sa presyo sa mga batakang palaliton ug produktong petrolyo.
Dugang pa niini, gipadayag sa grupo nga kinahanglang paspasan sa gobyerno ang pag-aksyon ug pagpaningil sa hustisya batok sa mga opisyal nga nalambigit sa pultahan sa korapsyon ug dili patas nga pagpadagan sa pondo sa publiko.
Taliwala sa ilang “dissatisfaction’ sa mga nakab-ot sa administrasyon, gipadayag ni Paglinawan nga magpadayon ang BAYAN Central Visayas ug ang mga kaubang organisasyon sa pagpahigayon og malinawong mga lihok-protesta ug sa ilang tradisyonal nga People’s SONA, aron masigurado nga mapadungog sa gobyerno ang tinuod nga tingog ug kahimtang sa mga ordinaryong mamumuo ug lungsuranon.
