CENTRAL VISAYAS- Gilauman sa Bagong Alyansang Makabayan–Central Visayas nga mahimong yawe sa pagbutyag sa kamatuoran ang pagkasikop kang kanhi Ako Bicol party-list Representative nga si Zaldy Co sa Prague, Czech Republic, may kalabotan sa giingong anomalya sa flood control projects sa gobyerno.
Kini ang gipahayag ni Jaime Paglinawan, chairperson sa Bayan–Central Visayas, nga ang pagdakop kang Co usa ka mahinungdanong lakang sa pag-usisa sa kontrobersyal nga proyekto nga naglakip og bilyon-bilyong piso nga pondo sa katawhan.
Matud pa niya, ang maong kalamboan posibleng magbukas sa dugang pang impormasyon ug magpadayag sa ubang indibidwal o opisyal nga nalambigit sa isyu.
Gipasiugda usab ni Paglinawan nga dili dapat kutob sa usa ka personalidad ang imbestigasyon, kondili kinahanglan kini moabot hangtod sa mga mas taas nga opisyal nga posibleng adunay papel sa pag-apruba ug pagpagawas sa pondo.
Dugang pa niya, kung mapamatud-an ang mga alegasyon, kinahanglan manubag ang tanang responsable, mapasakaan og kaso, ug maibalik ang giingong nakawat nga pondo ngadto sa katawhan.
Giduso sa Bayan–Central Visayas ang padayon ug transparent nga imbestigasyon aron masiguro ang accountability sa paggamit sa pondo sa gobyerno.
