CENTRAL VISAYAS- Hugot nga gipatuman sa Bureau of Fire Protection – Central Visayas (BFP-7) ang Oplan Santindig, usa ka inisyatibo nga gimugna aron mabungkag ang kurapsyon sa proseso sa pagrekrut sa mga bag-ong bombero sa rehiyon.
Kini ang gibutyag ni BFP-7 Regional Director Fire Chief Superintendent Fred Trajeras Jr. sa eksklusibong pakighinabi sa Bombo Radyo Cebu Newsteam, diin iyang gitumbok nga ang illegal recruitment sa Fire Officer 1 maoy sentro sa ilang gihimong kampanya.
Matud ni Trajeras, usa sa mga dakong babag nga ilang giatubang karon mao ang mga alegasyon nga adunay mga opisyal sa BFP nga nangayo og linibo ka pesos gikan sa mga aplikante isip baylo sa ilang pagkapili sa maong posisyon.
Giklaro ni Trajeras nga ang rekrutment sa BFP libre ug walay bayad, ug kinahanglan nga mosubay sa saktong proseso ug pamalaod.
Gipasabot niya nga dili kinahanglang mobayad ang usa ka aplikante aron lang makasulod sa serbisyo.
Sa maong lakang, gisiguro sa BFP-7 ang transparent ug patas nga pagpili sa mga kandidato.
Niadtong Lunes, Agosto 19, gihimo ang unang hugna sa maong proseso diin 136 ka bag-ong mga indibidwal ang opisyal nga napili nga mosulod sa kabomberohan sa Central Visayas.
