Subo nga gipahibalo ni Cebu City Mayor Nestor Archival ang usa ka trahedya sa Binaliw landfill human kini nahugno gumikan sa kadaghan sa basura n nagtapok sa lugar niadtong pasado alas 4 sa hapon sa Huwebes Enero 8.
Sumala sa report nga nadawat sa mayor, gibana-bana nga 94 ka mga trabahante ang anaa sa Binaliw landfill sa dihang nahitabo ang insidente, diin 27 kanila ang natabunan ug natanggong sa basura.
Sa gihimong rescue operation niadtong alas 10 sa gabii, siyam (9) ka mga trabahante na ang luwas nga nakuha gikan sa dapit, samtang 1 ang nakumpirmang nakabsan sa kinabuhi.
Gipasalig sa mayor nga dili mohunong ang pagpangita sa nahabiling 18 ka mga trabahante nga wala pa marekober.
Subay niini, misaad usab ang kagamhanan sa dakbayan nga ihatag ang tanang gikinahanglang tabang alang sa mga biktima ug sa ilang mga pamilya.
Ingon man nga nakatakda nga makigkita si Mayor Archival sa mga operator sa landfill karong adlawa aron sutaon ang hinungdan sa pagkahugno ug hisgutan ang dinalian nga mga aksyon aron malikayan ang dugang pang disgrasya.
Samtang, temporaryo usa nga gipahunong ang tanang kalihokan sa paglabay sa basura sa Binaliw Landfill, agi’g tubag sa nahitabong landslide.
Nangayo usab og kooperasyon ang mga opisyal ug pailub sa publiko, ug nagtambag sa tanan nga mag-monitor sa mga kasaligan nga tinubdan alang sa mga pahibalo kung kanus-a mobalik ang normal nga operasyon sa landfill.
Ang Binaliw landfill mao ang pangunang dumpsite sa Dakbayan sa Sugbo nga dugay nang gisaway tungod sa mga isyu sa kaluwasan ug polusyon.
Sa miaging mga tuig, gitaho usab ang pagkaguba sa yuta ug pagkahugno sa usa ka bahin sa landfill, nga nakahatag og kabalaka sa mga residente.
