Gilusad na sa kagamhanang lalawigan sa Bohol ang Provincial Mpox Hotline niini isip kabahin sa proactive nga aksyon sa pagpanalipod sa mga Bol-anon sa mga nagkadakong kabalaka kabahin sa sakit ng Mpox.
Ang maong hotline kay mao ang 0930-251-3020 nga nahisubay sa giluwat nga Executive Order No. 28 ni Bohol Provincial Governor Erico Aris Aumentado sa pormal nga pagtukod niini sa Provincial Task Force on Monkeypox.
Kini nagpasiugda sa kaandam sa probinsya agig pagtubag sa potensyal nga mga kaso samtang nagpauswag sa kahibalo sa publiko nga wala’y angay ikahadlok sa maong sakit.
Gani gipasalig ni Dr Van Philip Baton sa Department of Health – Bohol nga walay outbreak sa probinsya apan nagpasiugda lang kini sa kamahinungdanon sa pagpabiling mabinantayon sa natad sa public health.
Gipasabot sab niini nga aang ilang buahtan kay aktibong nakig-alayon sa kagamhanang lalawigan sa Bohol, mga healthcare units, ug mga municipal health officers aron mamonitor ang posibleng suspetsadong kaso para sa daling pagdalit og tambal ug isolasyon.
Ang pamaagi niini kay kuhaan sa sample ang suspetsado sa sakit dayon ang maong sample kay ipadala sa kaulohan para sa confimatory laboratory testing sa pag-diagnose ug posibling pagtubag sa sakit.
Sa pagkakaron, ang mga buhatan sa Bohol Provincial Health Office, PH Coast Guard, Bureau of Fire Protection, DOH ug mga lokal nga tambalanan ang aktibong sakop sa Bohol Task Force Mpox.
