CEBU CITY — Gipasigarbo ni Cebu 5th District Board Member Red Duterte ang kamaayo sa pagdisenyo human nga nahimong hisgutanan ang “branding” sa mga kalungsuran aron palambuon pa ang turismo.
Nasayran nga sa wala pa kini nisulod sa pulitika, dako ang interes ni BM Duterte sa paghimo og disenyo.
Pinaagi sa social media post niini, gipakita ang kaugalingong estilo sa paghimo og tourism branding sa mga component cities and municipalities sa Sugbo samtang na-lockdown.
Kung mahulagway, nagdepende ang official tourism slogans sa matag lungsod sa color, mood, ug font nga maoy nagrepresentar sa matag lungsod.
Sama lang sa lungsod sa Alcoy diin bida ang mga siloy birds, Oslob nga adunay dagway sa buntanding, Tuburan nga adunay kape, Mandaue City nga adunay cityscape, ug uban pa.
Apan gitataw ni BM Duterte nga dili kini ang official logo sa matag lungsod, inay personal project lang kini ug gipakita ang gugma sa graphics and design.
Usa sa mga gihuptang committee ni Duterte sa Provincial Board mao ang turismo. /gn
