Gihangop sa usa ka Filipino teacher ang wala damha nga prestihiyosong Big Apple Award alang sa academic year 2024-2025 sa New York City Department of Education.
Sa pakighinabi sa Bombo Radyo Cebu Newsteam kang Dr. Catalina Suerte usa sa mga magtutudlo nga giila sa tibuok New York City tungod sa iyang talagsaong pasalig sa pagtudlo diin gipaambit niini nga wala kini niya damha ilabi na sa kadaghang nominees ug daw mas angayan nga makakuha sa maong pasidungog.
Apan, taliwa niini dako ang iyang pasalamat ilabi sa iyang mga kaubanan nga nisalig ug nisuporta sa iyaha.
Nasayran nga nagsugod ang educational journey ni Dr. Catalina sa Cebu Normal University diin nakuha niya ang iyang degree ug naghupot og Doctor of Philosophy in Development Administration, majoring sa Education Governance.
Ug sa wala pa kini milalin sa Estados Unidos, migugol kini og 24 ka tuig nga nagtudlo sa De La Salle John Bosco College sa Bislig ug Ateneo de Cagayan.
Sa pagkakaron, si Suerte nagsilbi usab isip presidente sa Unified New Jersey Chapter, usa ka organisasyon alang sa Filipino ug Filipino-American nga mga magtutudlo sa Estados Unidos./
