CEBU CITY-Makabaton na og suplay sa tubig gikan sa linya sa Metropolitan Cebu Water District (MCWD) ang liboan ka mga residente sa 3 ka mga sitio sa Barangay Apas og 11 ka mga sitio sa Barangay Guba ning dakbayan sa Sugbo.
Kini atol sa gipahigayon “Commissioning of Distribution Lines” ug “Pipe-lating Project” sa MCWD kagahapong adlawa sa Biyernes, Mayo 9 sa maong mga dapit uban ang kagamhanang dakbayan sa Sugbo, mga opisyales sa barangay, mga residente, ug kaabag sa maong proyekto sama sa JE Hydro & Bio-Energy Corporation.
Gani sa Barangay Apas, ang mga sitio sa Upper Panabang, Lower Panabang, ug Grotto ang maserbisyohan sa maong palinya project sa MCWD diin liboan ka mga residenta ang makapanghimulos sa clean nga suplay sa tubig sa umaabot buwan sa Hulyo sa dihang matapos ang maong proyekto.
Gitambongan ang maong kalihokan nila Cebu City Mayor Raymond Alvin Garcia ug ni MCWD General Manager Engr. Edgar Donoso nga matod pa kapin sa 2 ka kilometro sa tubo ang giinstalar sa buhatan pinaagi sa “Tubig Pa More” program.
Samtang sa Barangay Guba, sulod sa 11 ka mga sitio nga masumpayan na sa linya sa tubig kay anaay gibana-bana nga muabot sa 6,000 ka mga residente ang makatagamtamg sa maong serbisyo.
Gani human sa maong kalihokan, modawat na og aplikasyon ang MCWD sa mga residente sa maong dapit aron sa hingpit nga suplay sa tubig matag panimalay.
