Magpabilin sa Alert Level 2 ang Bulkan Kanlaon sa Isla sa Negros, bisan pa sa kasarangang pagbuto nga natala kagahapon, Pebrero 19, nga milungtad og duha ka minuto, sumala ni PHIVOLCS Director Teresito Bacolcol.
Nasuta nga mga alas 4:38 sa hapon, ang bulkan nagbuga og itom nga abo nga miabot og 2,000 metros gikan sa crater, ug ang abo paingon sa habagatan-kasadpan.
Natala usab ang ‘pyroclastic density currents’ nga milunsad sa habagatan ug habagatan-kasadpan nga kilid sa bulkan, hangtod sa usa ka kilometro gikan sa summit crater.
Nagpasidaan ang PHIVOLCS nga hugot gihapon nga gidili ang pagsulod sa 4-kilometros nga permanent danger zone tungod sa risgo sa kalit nga pagbuto, pagkahulog sa bato, ug pag-agos sa abo.
Gitambagan usab ang mga residente ug lokal nga gobyerno nga mangandam alang sa posibleng epekto sa abo ug uban pang kalihokan sa bulkan.
Samtang, gipahinumdoman sa Office of Civil Defense ang mga komunidad sa palibot sa Kanlaon nga magpabiling alerto ug mosunod dayon sa mga pahibalo sa mga awtoridad aron malikayan ang peligro.
