CEBU CITY-Musulod na ang Bureau of Fire Protection national headquarter sa imbestigasyon sa nahitabo nga sunog sa Grand Residences Cebu Tower 4 sa Barangay Kasambagan, dakbayan sa Sugbo.
Gipahibalo ni FO3 Fulbert Navarro, ang fire investigator sa Cebu City Fire Office, nga ang fire investigator na sa kaulohan mupahigayon sa imbestigasyon isip protocol sa kabomberohan subay sa gidak-on sa danyos nga mugna sa sunog.
Matud pa, kung mulapas na sa 40 ngadto sa 60 milyones ka pesos ang danyos sa usa ka sunog, ang BFP-National na ang mupahigayon sa imbestigasyon niini.
Gitino ni Navarro nga igo na lang sila sa paghatag sa tanan nilang nakuha nga mga impormasyon ngadto na sa intelligence unit sa BFP.
Subay niini, giingong ang BFP National na ang makahatag sa mga impormasyon kalabot na sa dugang imbestigasyon nga gihimo human sa maong dakong sunog.
Kahinumdoman nga mi-igo ang sunog sa Grand Residences Cebu Tower 4 diin mikabat sa P4 bilyones ang danyos niini ug kini ang unang higayon sa kasaysaysan sa Cebu City Fire Office nga mideklarar ug Task Force Bravo, ang pinaka-taas nga alarma nga ilahang mapasaka.
