Gipasabot sa usa ka Former Team Captain (Azkals) Philippine Football Team nga lig-on ug competitive ang Team Canada isip usa sa mga koponan nga angay bantayan sa internasyonal nga kompetisyon karong tuiga.
Kini ang gipaambit ni Emelio “Chieffy” Asada Caligdong – BINC in Canada/Former Team Captain (Azkals) Philippine Football Team sa pakighinabi sa Bombo Newstwam, nga nailhan ang Canada sa ilang counter-pressing style ug disiplina sa pagdula, nga nakatabang sa pagpalig-on sa ilang kampanya sa mga nagkalain-laing torneyo.
Bisan adunay pipila ka sayop sa ilang unang duwa diin nakapuntos lamang sila og 1-1 nga tabla, giingong normal lamang kini tungod sa adjustment period sa pagsugod sa kompetisyon.
Dugang niya, nakahatag usab og dako nga kumpiyansa sa koponan ang ilang kasinatian sa pagdula sa daghang World Cup matches, lakip na ang presensya sa mga batan-on apan talentadong mga manlalaro ug usa ka organisadong sistema sa pagdula.
Samtang nagkaduol ang sunod nilang duwa batok sa Qatar karong Huwebes, giingon niini nga adunay maayong tsansa ang Canada apan dili angay pakamenoson ang ilang kontra.
Matud niya, lisod na karon pagtagna kung kinsa ang mopatigbabaw sa football tungod sa kusog nga pag-uswag sa daghang nasod ug sa kasinatian sa mga magdudula nga nagdula sa nagkalain-laing propesyonal nga liga sa kalibutan.
Gipahinumdoman usab niya nga sama sa nahitabo sa miaging World Cup diin napildi sa Saudi Arabia ang Argentina sa usa ka dakong kasurpresahan, posible gihapon nga mahitabo ang bisan unsang resulta basta andam ug organisado ang usa ka koponan.
