Dili ‘convincing’ ang estorya sa Mayor atol sa pakigtagbo niini sa mga manindahay sa Carbon Public Market sa milabayng adlaw, mao kini ang gikabutyag ni Winefredo Miro sa Carbon Alyansahon.
Gidugang ni Miro nga dili sila kampante sa maong pamahayag sa Mayor, gumikan kay alang niya, puro lang kini panaad.
Lakip usab sa gihisgutan ni Miro ang kaniadtong covenant nga gipirmahan sa Mayor nga wala matuman sa kung unsa ang gipirmahan niini, hinungdan nga lisud sila makombinsi niining giluwat karon nga pamahayag sa Mayor nga gipugngan niini ang plano nga motugot sa usa ka pribadong developer sa pagkolekta og bayad gikan sa mga tindera sa Carbon Public Market.
Kahinomdoman nga adunay panagtigom kauban ang mga vendors niadtong Huwebes, Pebrero 12, 2026, diin gipaniguro ni Archival sa kapin 4,000 ka mga tindera nga ang kagamhanan sa dakbayan gihapon ang modumala sa koleksyon sa pagkakaron aron mapugngan ang Cebu2World Development Inc. (C2W) sa pagpuli unta sa maong tahas karong Marso 1.
Ang tensyon sa merkado nagsumikad sa 2021 Joint Venture Agreement (JVA) uban sa Megawide Construction Corp., diin nabalaka ang mga manindahay nga mosaka og maayo ang abang ug arkabala kon pribadong sektor na ang magdumala.
Gipasabot sa mayor nga wala pa matuman ang mga legal nga rekisitos alang sa turnover tungod kay wala pa mamugna ang gikinahanglang oversight committee nga nalatid sa kontrata.
