CEBU CITY – Gisaad ni Cebu City Police Office Director Police Colonel Gemma Vinluan ngadtu sa mga security agency nga muhatag ug assistance ang kapulisan sa CCPO kung gikinahanglan.
Matud ni PCol. Vinluan nga dili magduha-duha ang mga security agency sa pagpangayu ug assistance sa kapulisan kung ugaling adunay daku nga kantidad sa kwarta ang ibyahe.
Kini subay na sa nahitabung robbery-shooting incident sa may Barangay Tisa, dakbayan sa Sugbo kung diin napusilan ang usa ka head guard kinsang maghatud unta ug sweldo sa ilahang mga tawu, ingun man patay ang usa ka kanhi pulis kinsang usa sa mga suspek sa maong pagpanulis.
Gipasabut ni Col. Vinluan nga dili na kinahanglan pa nga mag-convoy ang pulis inay iyaha gayud kining pasakyun sa van o unsa man nga sakyanan nga gamitun sa security agency nga magdala ug dakung kantidad sa kwarta.
Sigon pa nga dili basta-basta ang iyahang ipadala, inay kadtung mga pulis nga andam makigpatay ug mga holdaper.
Gibutyag sa police director nga mupatay man usab ang mga holdaper hayan magpadala kini ug pulis nga andam usab mupatay ug mga badlungun.
Subay niini, mihulga si Vinluan sa mga tulisan, holdaper ug uban pang mga badlungun nga dili basta-basta ang kapulisan sa dakbayan sa Sugbo hayan mas maayung magpuyu na lang ug magduha-duha na sa paghimu ug dautan.
