CEBU CITY-Dili supak si Police Colonel Gemma Vinluan, ang city director sa Cebu City Police Office (CCPO) nga mudawat ang mga pulis og regalo o token agi og pahalipay sa ilang accomplishments.
Kini subay sa pagtugot ni Presidente Rodrigo Duterte sa mga kapulisan nga mudawat og mga token o regalo basta dili ‘bribery’ butang nga gisupak usab sa pipila ka mga magbabalaud tungod kay mahulog man kini sa korapsyon o posibleng maoy sinugdanan sa pagpangorap.
Apan gitino ni Vinluan nga dili niya i-tolerate ang iyang mga sakop nga mudawat og bayad o regalo bugti sa pagsugo o dunay ipabuhat. Kana matud pa ang matawag og bribery.
Apan kung ang usa ka tao malipay sa kapaspas sa serbisyo sa kapulisan ug muhatag matud pa og pahalipay, dili usab niya did-an ang kapulisan nga mudawat sanglit kultura na matud pa sa pinoy ang manggihatagon.
Gihumug-atan hinoon sa director nga dunay pahalipay o wala buhaton gyud sa mga pulis ang ilang trabaho ug walay mawala kanila tungod kay igo man para nila ang ilang sweldo.
Gibutyag usab ni Vinluan nga sa iyang paglingkod wala hinooy mga pulis nga midawat og mga gifts o regalo agig ‘bribery’ ug tungod niini dako ang pagsalig og pagtoo ni Vinluan nga mga tarong ang mga pulis sa CCPO ingon man sa tibook Rehiyon-7
