Gironda sa mga operatiba sa Cebu City Police Office (CCPO) ang usa ka tindahan sa dalan Leon Kilat, Barangay Pahina Central ning dakbayan sa Sugbo nga gituohang gihimong bodega sa mga kinawat nga cellphones.
Gihimo ang pagpangronda sa kapulisan niadtong Martes sa hapon, Enero 20 nga sumala pa ni Police Col. George Ylanan, ang City Director sa CCPO nga nanukad ang ilang impormasyon human adunay mga indibidwal nga mireklamo nga na-locate nila ang ilang mga nangawalang cellphone sa maong dapit.
Gibana-bana nga anaa sa kapin 100 ka mga “iPhone” Apple products ang nakuha sa mga awtoridad nga gisulod sa tulo ka mga bags inabagan sa “Find My Device” feature diin usa ka indibidwal ang naaresto nga responsable sa maogn modus.
Gani sa pakighinabi sa Bombo Radyo Cebu News Team kang Barangay Pahina Central Councilor Nijel Borlasa nga daghang mga reklamo sa maong modus ang miabot sa ilang barangay nga gitumbok ang maong dapit human gitultol sa mga tag-iya ang ilang nangwala nga mga cellphone ug sa pagsumbong sa mga kapulisan.
Sa habig sa CCPO kay ilaha pang pagalawman ang imbestigasyon sa maong establisyemento ug gidani ang mga nawalaan sa cellpohone nga mureport sa ilaha aron masuta pa ang posibleng illegal nga koneksyon sa maong tindahan nga daw nagpadayong ug repair ug reselling business.
