CEBU CITY- Ipakatap sa Cebu City Police Office (CCPO) ang kapin sa 300 ka mga polis ug force multipliers sa Plaza Independencia aron masiguro ang kaluwasan sa mga mosaksi sa New Year countdown, unyang gabie Martes, Disyembre 31,2024.
Matod ni Police Lieutenant Colonel Maria Theresa Macatangay, ang deputy city director for operations sa CCPO, nga ilang gipaabot nga modagsa ang trapiko sa maong dapit atol sa maong kalihukan hinungdan nga ilang gimandoan ang ilang mga tawo nga makig-alayon sa Cebu City Transportation Office (CCTO) aron makontrol ang dagan sa trapiko.
Ipatuman usab sa CCPO ang hugot nga seguridad sa tibuok kalihukan aron dili makagukod ang mga mandurukot ug ubang mga kriminal sa ilang mga biktima.
Magbutang og mga pulis sa sulod ug gawas sa plaza aron mamonitor ang mga tawo ug mamentinar ang kahapsay.
Magsugod ang deployment sa kapulisan sa hapon sa dili pa magsugod ang mga programa paingon sa countdown sa Bag-ong Tuig.
Una na nga gipahibalo sa kagamhanang dakbayan sa Sugbo nga adunay New Year’s Countdown sa Plaza Independencia.
Diin, kagahapong adlawa nagpahigayon ang mga opisyales sa kagamhanang dakbayan og final coordination meeting nga naglakip sa Cebu City Fire Office, Cebu City Police Office, ug sa Cebu City Government nga gipangulohan ni Cebu City Councilor Jocelyn “Joy” Pesquera, kinsa maoy chairman sa maong kalihokan.
Present sa maong kalihokan ang bandang Rivermaya ug ang pasundayag usab sa bandang Nexxus ug uban pa.
Libre kini nga masuroyan sa publiko aron sa init ug malingaw ang pagsugat sa tuig 2025.
