CEBU CITY — Nanawagan ang Cebu City Police Office sa katawhan sa pagsumbong sa ilang buhatan kun ugaling adunay susamang nahitabo sa usa ka discobar nga nahimutang sa Mango Ave. nga nakalapas sa minimum health standards ug protocols batok covid-19.
Kini ang pamahayag ni PLtCol. Wilbert Parilla ang Deputy City Director for Operations sa Cebu City Police Office human nga adunay nakalapas nga discobar sa lagda.
Matud pa ni Parilla nga nasuta nga usa diay ka club ang naasoy’ng establishemento base sa description sa permit niini apan nakakuha kini ug special permit nga makaserve ug mga ilimnon bisan paman ang maong establishemento dili usa ka restobar.
Nagkanayon si Parilla bisan paman nga adunay special permit sa pagserve ug mga ilimnon ang maong establishemento, apan usa ka ‘club’ kini base sa permit niini ug klarong tataw nga ang mga restobars lamang ang makakuha ug special permit sa pagserve sa mga ilimnon ug wala pa gitugutan sa pag operate pagbalik sa Dakbayan ang mga discohan.
Tungod niini, kasamtangan karong nag review sa permit sa maong establishemento ang mga opisyales sa EOC ug BPLO ilabi na nga matud pa nga ang maximum capacity sa maong discohan base sa special permit niini moabot sa 300 ka mga indibidwal.
Base sa rekomendasyon nga namugna human sa nahitabong panagpulong kagahapon kauban ang EOC ug BPLO, temporaryong suspensohon ang special permit sa maong establishemento ug usbon ang klasipikasyon niini gikan sa ‘club’ ngadto na sa ‘restobar’ aron mahatagan kini ug special permit.
Panawagan karon sa kapulisan alang sa katawhan nga ireport kung aduna may mga establisyemento susama niini nga nakalapas sa minimum health standards ug mga lagda sa Cebu City Government.// BJG, BRA, BEP
