CEBU CITY- Hugot nga nagpatuman og 24/7 nga roving ang Cebu City Transportation Office (CCTO), sa nagkalain-laing dapit sa Dakbayan sa Sugbo, kini subay sa mga kalihokan ug aktibidadis sa Semana Santa.
Sa eksklusibong pakighinabi sa Bombo Radyo Cebu Newsteam kang Raquel Arce, ang pangu sa CCTO, diin iyahang nasaysay nga na sugdan na ang pag “deploy” nila sa mga personnel sa mga terminal ug mga pantalan, karong adlawa, Miyerkules Santo, Abril 16, 2025.
Kalabot sa kasaulogan sa Semana Santa, nagpakatap usab sila og enforcers sa pipila ka mga simbahan sa Dakbayan, apan, dili 24/7. Kadto lang mga simbahan nga nangutana ug nihangyo bahin sa ilahang schedule sa mga kalihukan aron sila maka-avail sa permiso sa pag-deploy og mga enforcer sa ilahang katugbang nga mga lugar.
Apan matud pa sa pamahayag ni Arce, niadtong mga simbahan nga walay na-deploy nga mga traffic enforcer, naa ra gihapon silay motorized traffic enforcer nga mag-roving sa mga kadalanan.
Sa pagkakaron, ang Mabolo Church ra ang gihatagan sa Traffic Management Committee (TMC), alang sa hangyo sa pagpasira sa karsada. Giklaro usab niya nga ang permiso dili lang gihatag sa CCTO, apan kinahanglan usab nga ihatag sa TMC ug City Council, labi na kung ang pagsira sa karsada molungtad og pipila ka mga adlaw ug oras.
Gipasalig usab sa CCTO nga hingpit silang andam, ilabi na kadtong mga dapit susama sa Tabor Hills, Good Shephered, ug V. Rama nga gilaumang daghang mga tawo ang moanha.
Para sa umaabot nga kalihokan sa Buhing Kalbaryo, wala gihapon silay gipatuman nga road closure, apan, gi-andam na ang mga permit alang niadtong gustong mo-avail.
Sa kinatibuk-an nga 200 ka gidaghanon sa mga Traffic enforcer, kana alang sa una ug ikaduha nga shifting sulod sa 24 ka oras. Samtang, adunay 20% sa 200 ang i-deploy atol sa ikatulong shift.
Masaligon usab ang CCTO nga ang mga Barangay Police Security Officers (BPSO) sa katugbang nga mga Barangay, deputized na gikan sa buhatan, mao nga automatic sila nga mo-coordinate sa ilang area of responsibility. ( Bombo Irene Ardiente)
